Phili 2 | ZomZIV | STEP | Christ tawh note kigawmna hangin kihanthawnna khatpeuh na neih uh a, a itna panin kihehnepna khatpeuh na neih uh a, Kha tawh kipawlna khatpeuh na neih uh a, kikhuatuahna le kilainatna khatpeuh na neih uh leh

Philippians 2

Christ’ Lungsim Neihna

1 Christ tawh note kigawmna hangin kihanthawnna khatpeuh na neih uh a, a itna panin kihehnepna khatpeuh na neih uh a, Kha tawh kipawlna khatpeuh na neih uh a, kikhuatuahna le kilainatna khatpeuh na neih uh leh 2 lungsim kibangin om a, itna kibang nei in, lungsim le tupna kikhatin na omna uh tawh ka lungnopna na kimsak un. 3 Huaihamna le kihisakna tawh bangmah hih loin kiniamkhiatin no sangin midangte a hoihzaw-in na ngaihsun un. 4 Note khempeuh in no angsung ding bek khual loin midangte angsung ding zong na khualsak ciat un. ^a

5 Note in Christ Jesu lungsim bang na nei un:

6 Amah Pasian pianngei ^{▼▼2.6 Ahikeh lim le mel in} taktak hi napi ^c
Pasian tawh kikima om ding khiatlahna a letcip ding ngaihsun loin, ^d
7 bangmah kihisak loin
nasem pianngei ^{▼▼2.7 Ahikeh lim in} tektek hong nei-a ^f
mihing tawh hong kibang zaw hi. ^g
8 Mihing mel taktak hong pua a,
amah le amah kiniamkhiatin,
singlamteh tungah a sih dongin thu a mang tazen hi! ^h
9 Tua ahi manin Pasian in amah a sang pen munah tawisanga, ⁱ
min khempeuh sanga min tungnung zaw pia-in,
10 tua Jesu min ah vantung,
leitung le leinuai-a om khempeuh khukdinin, ^j
11 leii peuhmah in, “Jesu Christ, Topa hi,” ci-in pulak dinga,
Pa Pasian minthanna ahi ding hi. ^k

Aksite banga Tang Ding

12 Tua ahi manin kong it lawmte aw, thu na man densa bangun ka om sung bek hi lo, ka om loh sungin zong ka thu hong mangzaw in, lau kawm ling kawmin note hotkhiatna na semkhia den un. 13 Ahang in, a hoih ama deihna bang a deih ding le a sem dingin note sunga a sempa, Pasian ahi hi.

14 Na khempeuh phun lo sel loin sem un; 15 a lungsim kawi le lungsim mawk khangmite lakah no Pasian tate, mawh nei lo, kawkbaang lo, siangtho in, khuavannuai-a aksite bangin na tan theih nadingun 16 nuntakna thu na letkip ^{▼▼2.16 Ahikeh lenkipsuak} uh tawh kizui-in ka taina le ka nasepna a mawkna hi lo hi, cih Christ ni-a ka kisialh nading ahi hi. 17 Ahi zongin note upna pana piang kithoihna leh nasepna tungah dawntheih-a biakna bangin, biaknain kei hong kisungkhia taleh note khempeuh tawh nuamin ka lungdam khawm veve hi. 18 Tua mah bangin note zong nuamin kei tawh na lungdam khawm ding uh hi. ^m

Timothy le Epaphroditus

19 Note thu ka zak ciangin kei zong ka kipak theih nadingin a sawt loin, note kiangah Timothy kong sawl pah ding Topa Jesu sungah ka lamen hi. 20 Note hoih nadinga hong khual taktak ding amah lo midang ka nei kei hi. 21 Ahang in, mi khempeuh in Jesu Christ khual loin amau angsung bek a khual uh hi. 22 Ahi zongin tapa in a pa tawh a sepkhawm bangin Timothy in kei tawh lungdamna-thu a sepkhawmna ah amah le amah in a omzia a kilangsak hi, cih na thei uh hi. 23 Tua ahi manin kei tunga a piang ding thu a kitel phetin amah kong sawlpah ding ka lamen hi. 24 Kei mahmah zong kong paipah ding Topa sungah ka muang ngam hi.

25 Ahi hangin ka sanggampa, ka naseppih pa le ka galkappih le note thupuakpa zong ahi, ka kisapna teng hong huh dinga nong sawlpa uh Epaphroditus note kianga kong sawl kik ding kisam ka sa hi. 26 Ahang in, na zaksa bangun amah cina-a, note khempeuh hong ngai-in a lungdong hi. 27 Amah cina takpi-a, a si dektak hi. Ahi zongin Pasian in amah bek hi loin kei zong hong lainat a, dahna a kisuangsawnin hong tuaksak kei hi. 28 Tua ahi manin, note in amah na muh uh ciangin na nuam theih nading uh le keimah zong ka lunghimawhna a tawm tuam nadingin amah kong paisak ding ka lawpzawsan hi. 29 Topa sungah nuamna lianpi tawh amah na muak unla, amah bang mite na pahtawi un. 30 Bang hang hiam cih leh note in kei nong huh theih lohte uh hong huh dingin a nuntakna khaamin Christ na semin a si dektak hi. ⁿ